Tadiom-pitiavana

Lokin’ny hehy i Malala vao tonga tany ambony namerina tao an-tsainy ny endriko io hariva io... Toa hitany ny masoko nivandravandra aloha, avy eo niherikerika fa sao nisy nahita... ary koa ny hetahetako ny hiresaka aminy mandra-pandehako... Faly erý ny anao vavy nankaloza ahy... "Tena mba tia ahy koa irý izy," hoy izy niteny irery, sady nanala moramora ny akanjony, hiditra ao amin’ny salle de bain. 
Nijery fitaratra kely aloha i Malala sady nisintona ny tiroir ambony indrindra, ka naka borosy handaminany ny volony lava sady malefaka... ny sainy manontolo amin’ izany tatý amiko foana, mbola mahalokiloky azy foana ilay paoziko…" Aleo aloha handeha amin’izao" hoy izy "fa izao no mampilamina ny fiainako. Tsy hanatona azy mihitsy aho, amin’izay aloha tsy hisy fakam-panahy handemy ahy, fa omeko signes kely eny foana izy hampitako aminy ny hafatra hoe tsy manadino azy akory i Malala, fa saingy mahay miaro ny rambony fotsiny..." 
Nojereny ny baignoire ary notsapainy ny hafanan’ny rano izay efa nomanin’ny mpanampy ho azy, izay izy vao niditra tao, sady nitsotra moramora rehefa avy namono serviette ny lohany... Dia nosafosafoiny teo ny sandriny, ny vatany, ny feny, izay mila tsy ho takany intsony, ary ny kibony mitondra ilay zanany amin-dRatrema... Nakipiny ny masony ary navelany ny rano hilamina hanatoniany ny vatany sy ny sainy, hiatrehany ny torimasony tamin'io hariva io... 
I Ratrema no nanolotra ny serviette éponge ho azy sady nanafy azy tamim-pitiavana ary nitarika azy tany an’efitra fandriana nony avy eo... 
- "Mampalahelo ahy indray i Rahery," hoy Ratrema sady nanomboka nanala ny akanjony. 
- "Fa maninona?" hoy Malala nody fanina, "misy olana angaha izy sy Alexia?”
- "An, an, an! toa tsy be teny izy teo am-pisakafoanana, kanefa hitako te-hiresaka mafy mihitsy ity izy... Asa na momba ilay zaza angamba? Sao tokony holazaina azy ihany ny marina ry Malala?"
- "Ratrema a! mbola manahy izay mety any am-pony aho ka aleo aloha handeha amin’izao, fa sitrany ahay miaro ahy tsy horebirebeny eo indray..."
- "Marina ihany aloha ny teninao e! Ho hita eo rehefa teraka ianao!! Aleo aho aloha handro kely fa vizambizana aho izany..."
- "Mba itondray rano amin'ny vera aho rehefa miverina ianao fa adinoko ny nampiakatra teo."
- "D’accord ma chérie!"

Fa ny tatý aminay kosa tamin'io mbola tsy tapitra ny andro. Nony tonga tato an-trano aho dia gaga raha nahita harona feno akanjon-jazakely... 
- "Mama a! misy havantsika teraka angaha?"
- "O ry Hery a! ho an’ny zafikeliko ireo fa adinonao angaha?" 
- "Zafikelinao iza koa?"
- "Fa ny zanakao ka! Sa odinao tsy fantatra indray?"
- "Mama a!!!" Hoy aho sady namonjy nipetraka... Isika mianaka moa efa nifanaiky fa tsy hifanafina izay mitranga intsony, ka aleo hotantaraiko anao ny fandehany ankehitriny..." 
Dia naka toerana i Ramatoabe ary notantaraiko azy ny nitranga rehetra any amin-dry Malala. Ny tsy fahazoany manao inon’inona, ny tsy firesahan-drizareo ny momba azy, ny adin-tsaina mahazo azy, ary ny alahelon’i Alexia eo anatrehan’izany rehetra izany... Rehefa nangina elaela teo aho dia namaly ahy i Mama: 
- "Mampalahelo ahy ianao izany anaka, nefa inona moa no azontsika atao fa dia aleo miandry izany. Faly aho hoe vavikely izany ilay faharoa! Asa na hanahaka an’iza na iza? Rehefa teraka ve izy ry Hery tsy ho avelany handray ny zanakao ianao a!"
- "Ka na i Toky aza ange ry Mama ka mila tsy ho hitako intsony e! Raha mandreraka ny lohako eo ireo dia holazaiko an-dRatrema mihitsy fa zanako i Toky!"
- "Dray ry Hery! aza manao an’izany, fa tsy heverinao angaha ny fofombadinao fa miray trano amin-drizareo?"
- "Izay sisa no mitazona ahy ry Mama a! Izany ry Malala izany, na ny fako eny amin’ny tany aza misy dikany noho izaho, androany anefa izy nanao geste kely nanaitra ahy izany. Asa na inona no dikany na inona?"
- "Geste kely ahoana ry Hery?"
- "An, an, an ry Mama a! tsy misy dikany," hoy aho nivoara-mena...
- "Hery! Tandremonao anie sao manaonao foana any indray ianao anaka e!"
- "An, an, an ry Mama a! tsy izay eritreritrao izay akory fa zavatra hafa..."
- "Koa tsy lazaina ahy?"
- "Aleo aloha amin’izao fa raha misy fiovan-javatra dia lazaiko anao ihany! Efa nisakafo angaha i Mama? Noana ho azy koa aho tamin’ilay làlako teo."
- "F’angaha indray ianao tsy avy nihinana tany? Misy ambiny ao raha tianao!"
- "Tena tsy nahaovoka aho tany e! Inona no laokan’i Mama tato?" hoy aho sady nanokatra vilany. 
- "Dray! ravitoto tsara be! An, an, an! ndeha hihinana aho ka!" 
- "Etsy aloha hafanaiko kely ry Hery a!" 
- "An, an, an! elabe izany fa izao mangatsiatsiaka izao izy mora hohanina!"
- "Asanao ary anaka fa dia mazotoa!"
Izaho etsy mikesokesoka mafy mihinana ity sakafoko, toy ny zato taona aho tsy nahita hohanina... ny mason'I mama kosa etsy anatin’ilay harona sachet misy akanjon-jaza... "Malahelo ny zanako aho," hoy izy toa miteny irery nony farany! Tsy mety izao ataon-drizareo izao fa ho any aho rahampitso," hoy izy tany an-tsainy tany. Hahita ahy kely ianareo anio ry Mpanana!"

Ny ampitso maraina, vao nangiran-dratsy dia nivoaka vao maraina i Mama. Tsy nipy maso izy iny alina tontolo iny fa dia maika handeha ho any amin-dRatrema no tao an-dohany. "Hapoakako ny marina" hoy izy, “dia ho hita eo izay ho tafavoaka velona. Rehefa levona ve izy mianakavy tsy ho izaho no hitaiza ny zafikeliko?"
Poa toa izay izy dia tonga teo am-bavahady ary mbola eo am-panapotserana tsy an-kijanona ity lakolosy fiantsoana izy, no indro i Malala tsy hitany akory avy ao aorianany. 
- "Tsy i Maman’i Hery ve ianao azafady?"
- "Ah, i Madame Malala? Manao ahoana ianao ry Madama?” hoy mama sady safotra nitambotsotry ny fahatairana izy. Nosaringotin’i Malala avy any anaty entany avy any haingana ny telephone-ny dia niantso ny hopitaly handefa fiara izy. I Ratrema moa efa lasa vao maraina be nijery asa, ka izany no nampifoha maraina an’i Malala sy nivoahany naka rivotra tany ivelany. Afaka antsasak’adiny, tonga ny fiara. 
- "Fa inonao ry Madama ity vehivavy ity?”
- "Tsy fantatro io tompoko hoe iza na iza, fa olona sendra nandalo fotsiny angamba io," hoy izy niala sady niditra tao an-tranony haingana. 
Ny dokotera koa moa tsy nanadihady be loatra azy vao nahita ny kibony. 
Nitebiteby fatratra i Malala io maraina tontolo io noho ny laingany tamin’ny mpitsabo tonga naka an'i Mama teo ambavahadiny. Asa koa izay antony nandaingany fa izao izy vao lasan’eritreritra mafy tamin’iny zava-nitranga iny. Saika hiantso an-dRatrema izy kanefa niahotra indray, hiantso ahy moa, toa tsy ho vitany mihitsy fa dia natahotra izay handraisako ny fihetsiny izy raha fantatro ny marina. Nony efa nieritreritra elaela teo izy dia nanamboatra saina fa nety ihany iny fihetsiny iny, satria tsy fantany marina izay antony nahatongavan’i Mama tany aminy vao maraina mandeha irery toa ireny.
Nony atoandro dia tonga i Ratrema hisakafo, inty eny an-tànany nisy harona plastika maloton’ny vovoka. 
- "Malala, fa entanao angaha ity no dia narianao tao am-bavahady?" hoy izy sady nanoroka ambadiny. 
- "F..fffa inona moa iny?" hoy izy gaga. 
- "Ohatry ny akanjon-jazakely ny fahitako azy, avy niantsena angaha ianao?"
- "Iiiie! Hay adinoko tao am-bavahady hatramin’ny entako marina... Variana nitady lakile hamohana vavahady aho teo dia tsy tsaroako akory ny harona teny an-tànako. Misaotra Ratrema!"
Nosokafan’i Malala ilay harona ka indreo akanjon-jaza maromaro no tao anatiny... "Tena an-dRafotsy teo itý!" hoy Malala niteny irery... "saika homeny ahy ve? Fa ahoana? Fantany angaha sa maninona? Aza hitako ka fantany hoe zanak’i Hery i Toky! Ity Hery koa moa mbola mino hoe zanany koa ity ato an-kiboko ity... Loza... Inona no ataoko? Holazaiko an-dRatrema ve? Ary raha fantany ny marina rehetra dia ahoana ny tohiny? An, an, an! tsy haka risika amin’izany mihitsy aho ka!! Aleo aloha ho amin’izao!"
Nony hariva ny andro, efa tafatory iny daholo ny olona, no injay ny telefonin’i Alexia naneno tampoka... 
- "Allo, ie izaho ihany, fa misy inona... An? fa nankaiza? An, an, an, tsy fantatro! Dia ahoana? Aleo fa ho avy any izahay sy Papa..."